Monday, December 29, 2008

شايف نفسك تسد في الشغلانة دي؟







نهار داخلي:
يدخل الباشا مرتدياً زي جنايني ويدور بينه وبين المدرس نجيب الريحاني الحوار التالي:
الباشا: وإنت شايف نفسك تسد في الشغلانة دي؟
يعني ضليع في قواعد اللغة العربية؟

في أصول اللغة العربية؟

الريحاني: أيوة... زي ما أنت ضليع في قواعد الجزر وأصول البقدونس والفجل الرومي
الباشا: إنت باين عليك قليل الأدب
الريحاني: وإنت باين عليك رغاي وغلباوي

وينتهي الأمر "بسطوة" الباشا أن تصبح "ما انحل" من أخوات كان... الشقيقات

لأسباب خارجة عن إرادتي - مش خارجة عن إرادتي قوي يعني - كنت أراجع تدوينات هذه المدونة وأقرأ التعليقات القديمة.
ضحكت شوية وعيطت شوية وخفت شوية، إنما بالصدفة وقعت على تعليق قديم وجدت ضرورة للرد عليه لسبب مستفزني بقاله كام يوم

التعليق أهه

Zobaida:
Are you qualified enough to pass "fatawa" concerning hejab and neqab and so on?? It is not enough to "read" a couple of books and come up and say X is halal and Y is haram, dear. You have to have a theoretical and practical background, so please seebi il din lil 3olama w khalliki f nafsik inti.. do you want to wear hijab?? If so, go ahead and wear it. Do you wanna take the risk and not wear it?? In this case go ahead and leave it alone--but bear in mind that you may be right and may be wrong in what you think and do-- Being Zobaida does not mean you are always right. No mad person admits he is a mad person, my dear.Good luck!

ترجمة سريعة لما يهمنا في هذه التدوينة من تعليق الأخت أو الأخ المجهول (لأن ما لا يهمنا يحتاج لكتاب للرد عليه مثل برنارد شو حين سئل: ما هي الشيوعية على ما أذكر، والتشبيه طبعاً لحجم الكتاب وليس لشو - المقامات محفوظة) هو سؤالها أو سؤاله: هل أنت مؤهلة كفاية لإطلاق الفتوى بشأن الحجاب والنقاب وما شابه؟ لا يكفي أن تقرأي كتابين لتأتي وتقولي أن سين حلال وصاد حرام يا "عزيزتي"

أما ردي عليه فهو رد الأزهر الشريف بالموافقة على نشر تفسير للقرآن لسيدة - ومن تكون هذه السيدة يا ولاد؟ كاريمان حمزة! كاريمان حمزة يا سادة، فليعطني أحد سبباً وجيهاً يجعل واحدة زي كاريمان حمزة مؤهلة لتفسير أي حاجة لمجرد إنها بتغطي شعرها من الثمانينيات. كاريمان حمزة التي أدخلت عمر عبد الكافي التلفزيون وفخورة باعترافها.

الأزهر الذي صدعنا أهله بالحديث عن "غير المؤهلين للفتوى" يبارك للأخت التي لا أستعني أطلب منها تفسيراً لمثل شعبي من نوعية يا مآمنة للرجال يا مآمنة للمية في الغربال تفسيرها للقرآن.

الموضوع طبعاً مش إني ضد إنها تفسر القرآن زي ما هي عايزة كل واحد حر. هي تفسر وإل يقتنع يقتنع وإل يشتم يشتم.
أنا بأتكلم على الأزهر، صرحنا في مواجهة المش عارف إيه والمش عارف إيه وإل إسمه إيه

إياكو حد يفتح بقه بعد كدة.
بس.هه
وبالنسبة لمن سيقول إن الفتوى أهم من تفسير القرآن فسأفقد النطق مقدماً تحسباً يعني
ملحوظة جانبية:لا أذكر بالضبط متى أطلقت فتوى، أم أن كل كلام في المعتقد الديني هو فتوى وأنا ما أعرفش؟

12 comments:

^ H@fSS@^ said...

يا زبيدة يا حبيبتي لازم تقولي نفس كلام اي حد مخالفك (يعني مينفعش تخالفي)و تكون مرجعيتك نفس الشيخ كمان
فمثلا اذا استشهدتي بكلام لجمال البنا قالولك انه بيخرف
فقط لانه مختلف
لكن اذا قلت عن معاذ ابن مسعود بتاع برنامج ابصر مش عارف ايه
فيبقى كلامه صح و واجب علينا كمان

فطبعا لا انت و لا انا و لا اي حد بيفكر بمخه مؤهل انه يفسر او يفتي في اي شئ ديني

ردا بقى على سؤالك
فانتي مش لازم تقولي انك بتفتي
يكفي انك حكيتي بالدين و هما الناس حياخدوه فتوة شرعية مؤكده و بعد 100 سنة حيتحول لحديث و مش بعيد يكون قدسي كمان و مروي عن عدد هائل من اشخاص عمرنا ما سمعنا عنهم
فهنيئا لاحفادك بربح حقوق الملكية

تحياتي

~*§¦§ Appy §¦§*~ said...

ازهر ازهر ده فين ده انتي بتتكلمي عن زممممممممان اوي كان فيه الازهر هو مناره الاسلام انما دلوقتى سوري مع شويه الهشكه اللى موجودين بقى اللى بيحكمهم السياسه والاهواء وبس
وبعدين اللى بيقول فتوي بيتحملها واللى بيتهم حد بحاجه برضه بيتحملها بس خلاص ها بقى بلاش حرقه دم من ناس بتقول اي كلام يا ستى
وبعدين معلش اللى بيلبس حجاب فلنفسه نقاب لنفسه واللى عاوز يصدق اللى بيسمعه هو حر واللى مش عاوز برضه هو حر كل واحد عقله فى راسه يلبس عليه زعبوط بدل ما يطير

Che said...

المشكله مش مشكله انك بتفتى او لا .. الحقيقه انه مبقاش حد مستعد يسمعك مع انك ممكن جدا تكونى مش بتفتى و انك بتقولى رايك و بس بس برضه يقولولك ماتفتيش و هو كده مع انك تقولى رايك ده ابسط و اول حاجه فى الحريه و الديموقراطيه و القران نفسه اللى هو كلام ربنا فيه قمه الديموقراطيه " من شاء فليؤمن و من شاء فلكفر " و استفتى قلبك و لو افتوك
و اخيرا البوست ده بيفكرنى بحاجه حصلت فى السعوديه " اصل الوهابيه و السلفيه و التشدد " .. كنت باصلى فى الجامع و الامام بيقرا ايه ( انا مش فاكرها دلوقتى ) المهم الامام غلط فكان جنبى دكتور سودانى رده .. الامام قرا الايه غلط تانى فالدكتور رده تانى .. الامام قرا الايه غلط للمرة التالته فالدكتور سكت المره دى ... الامام خلص الصلاه و سلم و قبل مايقوم التفت لينا و قال مين اللى ردنى فالدكتور قاله انا .. الامام ساله انت شيخ قاله لا انا طبيب قاله يبقى بتردنى ليه و انت مش شيخ و مش دارس الدكتور قاله انا حافظ لكتاب الله و ممكن نجيب المصحف و نحتكم ليه .... رد الامام كان اعجب حاجه خلتنى اضحك و انا لسه قاعد فى الجامع .. الامام قاله احنا هنا بنصلى كده لو مش عاجبك فى جامع تانى على اول الشارع ابقى صلى فيه .. ربنا لا تحاسبنا بما فعل السفهاء منا

Che said...

تعليق اخير لما سالوا برنارد شو عن الشيوعيه الراجل ماردش بكتب انما كان رده عملى اوى
برنارد شو كان اصلع و شعر صدره تقيل
فشاور على صدره و قال غزاره فى الانتاج و بعدين شاور على راسه و قال و سوء فى التوزيع

زفت said...

السؤال الاهم:

ما سبب مراجعتك لبعض التدوينات والتعليقات القديمة؟

هل أصابتك النوستالجيا في هذا الزمن الرديء؟ :)

سؤال اخر

أغلب كتاباتك تتمحور حول حقوق المرأة لكني لم أستطع حتى الان تحديد المدرسة النسوية التي ترينها الاقرب الى فكرك ومفاهيمك - لا بد ان مثقفة نسوية مثلك تملك رأيا متماسكا حول هذه المدارس وتجد منها ما هو الانسب الى واقع المرأة في المجتمع المصري والعربي

في هذا السياق هل توافقين ان مدرسة ال cultural feminism هي ربما الانسب لواقع المرأة العربية في المدى القريب على الاقل؟

بالنهاية اسمحي لي ان اعبر عن اعجابي الشديد بفكرك الحاد ودقة تعبيرك وقرائتك النافذة

Lucifer said...

ياه فينك من زمان
رغم ان مدونتك وجعت دماغى
ملحوظة:وجع الدماغ هنا ايجابى لانه بسبب قراءة المدونة باكملها!!فى ليلة واحدة
لكن من الجيل تلك العودة و احتمال وجع الدماغ بسبب اراء قيمة
بلاش تغيبى كتير كدة فضاء التدوين من غير الناس اللى بتفكر بايخ مووووووووووووووووووت

بنت القمر said...

ليكي مطلق الحق تقتنعي بتفسيرها او لا
ورغم اني عرفت الموضوع من مدونتك"حصولها علي الاجازة في التفسير"لكن شفت مقابله لها في دريم في نفس اليوم عن نفس الموضوع
وازاي هي مش ازهريه مجرد حاصله علي ماجستير علوم اسلاميه
لمن الجانب الايجابي في الامر
ان ليس الازهر وحدة _الذي اوافقك تماما علي انه ربما تصدر عنه كثير من الزلات والشطط
الازهر هو الذي منحها الاجازة
ولكن ايضا مجمع البحوث الاسلاميه
وهنا الموضوع يختلف جدا
يعني تنتفي شبهة مجامله او تربح او او
بالعكس انا شايفه ان للامر وجه ايجابي انها اول سيده في العالم يعترف بتفسيرها للقران وهنا "في رأيي يخطو الازهر خطوة ايجابية "في الاعتراف ان للمرأه عقل ايضا تستطيع ان تقرا به وتفسر
يعني مش عشان هي اول محجبة في التلفزيون بس
نقطه عمر عبد الكافي
اعتقد انها كانت منذ سنوات طويله جدا
يعني انا ممكن انصح الاخرين بزيارة مدونتك لكن لا اتحمل بالضرورة ابدا نتيجه ما تكتبينه ولا اكون بالضرورة مسؤله ابدا عن ارائك وتوجهاتك
موضوع الحجاب والفتوي
اعتقد ان الموضوع ابسط مما يكون
وكل الحرب بين انصار الطرفين لا معني لها فالامر منوط بالحرية الشخصيه والقدرة علي تحمل تبعات اي اختيار
الاخذ بفتوي الازهر بوجوبه او الاخذ باجماع الائمه الاربعه علي شكله" ستر الجسد ما عدا وجه وكفين" ترك الاثنين والاعتقاد بقوة انه تقليد اجتماعي مرتبط باي جهة او دوله
وبرضه بسيطه
او الاعتقاد بوجوبه مع تاجيل الالتزام به او الاقرار بعدم القدرة علي اداء هذا الالتزام
يعني لا تتعب ولا تحتار
الموضوع منوط باختيارك واقتناعك باسباب الاختيار بعيدا عن الهوي
ثم قدرتك علي تحمل هذا الاختيار
تحياتي

أمل أسكاف said...

العزيزة زبيدة
في العادة ما يجر اليساريين والعالمانيين لذات الفخ بسهولة .. ويمكن أول مرة حصل فيها ده كان في بداية التسعينيات لما أنهار الأتحاد السوفيتي وأصبح من اللازم على الشيوعي أنه ينكر قدام كل الناس - وأحياناً قدام نفسه - أنه مصدق .. وبالتالي بقي صيد سهل لآي صياد ذكي قادر على أنه يشده لأرض الجدل عن أشياء هو بحكم تكوينه الأيدولوجي والفكري وأحياناً الثقافي ضد عقلانيتها .. ولانه أصبح مرعوب من الأعلان عن أفكارة بقي يدور جوه الأسلام على مبررات تؤيد أفكاره
ولك أن تتخيلي أن نجد داخل ديانة لم يدخل عليها أي تعديل أو تفسير جوهري منذ العصور الوسطي ما يبرر رفضنا للحجاب أو حتى تبرير خروج المرأة للعمل أو دخولها في علاقة حب ...
صعب مش كده إلا إذا قمنا بألعاب بهلوانية داخل النصوص لتأكيد أفكرنا ودخلنا في ألعاب تأويل يمكن نتمسك بيها وكأنها جريمة بمنتهي السهولة ..
وزي ما قال صديق متدين ليه : أنا مش معترض أنك تكون شيوعي لكن معترض أنك تدعي أنك مسلم وتحاول تخرب لي ديني ..
وبس
وكل سنة وأنت دائماً طيبة ..عام سعيد

Blank-Socrate said...

اولا حمدالله على السلامه
فقدت الامل فى عودتك للتدوين
اول مرة اخد بالى من الاسم زبيدة :)
--------------------------
امتنع عن التعليق فى هذا البوست

مرجانة الغلبانة said...
This comment has been removed by the author.
soly88 said...

كويس انك رجعت
علشان الخفافيش كترت
عايزين شوية نور
ولا تعليق على هراء عماره وامثاله بتوع الفضائيات

زبيدة said...

زفت:
لأ أنا لا نسوية ولا بتاعة مدارس، القولبة بتتعبني جداً

أنا أنا