Tuesday, March 18, 2008

قالولي داروين اتقلقل امبارح في تربته... قلتلهم معذور


أمامي على التلفزيون واحد اسمه معز مسعود، لابس بدلة وكرافتة وعامل سكسوكة من إل هي يادوبك طالعة دي، كإنها لحية عمرها ثلاث أربع أيام، لحية شكسي بصراحة وماحدش يقدر يقول الراجل مش ملتحي، قاعد مع معتز الدمرداش في 90 دقيقة وموضوع تحت اسمه لقب: داعية ومفكر إسلامي. شغال. كل مسلم داعية وكل انسان مفكر في دينه. فلسفة معز في الدعوة و"التفكير الإسلامي" بسيطة، وهي نفس فلسفته في لحيته على ما يبدو::

الهروب من ثنائية الحلال "الخنيق" المقابل للحرام المبهر

أيوة، "الخنيق"، هو بيوصف فلسفتة نصا هكذا بدون أي تصرف من طرفنا. طريقة معز في تحقيق دعواه لجعل الحلال "كوووول" كما "يقووووول" بسيطة إلى درجة سذاجة الشباب "المخنوق"، أعطي أنا المثل عليها بلحيته الكووول، ذات السكس أبيل المعروف المطروق من أول كيرك دوجلاس إلى جورج كلوني، بدلا من اللحية الطويلة الخنيقة التي تجعل الفتى يبدو كسعافة أصابها شيء من خيوط العنكبوت وهباب سقف المطبخ مكان قلية البطاطس والباذنجان للواد والبت بينما تقوم ربة منزل نشيطة بتسعيف السقف من "الهلوس" في تنظيفة العيد الكبير الذي ستتغدى فيه حماتها أم لسان زي المبرد عندها فيه. وهذا شأني في استنباطي للأمثلة، أما معز نفسه فيعطي المثل التالي على منهجه::
معز له تجربة في تلحين الأغاني، قدم له شاعر أغنية عاطفية، والكلمات تقول شيء أشبه بـــ:
مش عايز غيرك في الحياة لو تسمعيني، وهأوصل للسما عشانك، مش عارف إيه كدة... كلام من إياه إل على كل ناصية ومالوش لا طعم ولا معنى.
فحل معز معضلته مع الأغنية العاطفية الحرام المبهرة مقابل الشباب المخنوق بأن سمى الأغنية "تتجوزيني". فتواءمت مع منهجه في تحويل "الحلال الخنيق" إلى "الحلال الكوووول"، ليه بقى؟ لإنه فجأة، وبإضافة الكلمة المعجزة حققت الأغنية التطور المذهل المذكور أعلاه لإنها بقت بتتكلم عن الجواز - إل هو حلال، وزي ما إحنا عارفين كوووول كمان.

إنما جون معز الحقيقي الذي هز الشبكة وما كان يقدر عليه عصام الحضري لا قبل العقد بتاع برة ولا بعده كان في عرض واحدة من نظرياته - وكمفكر، لازم يكون له نظريات طبعا وصولات في الجدل - التي ألقاها في مناقشة الملحدين لاثبات منطقية الحجاب "علميا" - آه والنعمة دي علميا - ودي بصراحة جديدة لانجججججججججج (ومن النادر أن تسمع أي حاجة جديدة أصلا عن الحجاب من الجانبين، ناهيك عن أن تكون لانججججججج) ثبتوا أنفسكم في الكراسي:

معز: "كنت بأتكلم مع واحدة ملحدة دانمركية في مرة، فقلت لها إنت ملحدة فخليني أكلمك بلغتك، بالدارونية. البنت إل بتطلع على الناس متجملة دي على طول أو تظهر في المجلات بتأثر سلبا على التطور. سألتني ليه؟ قلت لها لإنها هترفع مقاييس الجمال جدا، مش بالشكل ده مقاييس الجمال ترتفع؟ ولما تترفع مقاييس الجمال هتأثر على التطور لإن كل الستات هتعنس، وبالتالي ده هيأثر على البقاء. قالت لي: ياه، عندك حق، أنا أول مرة أشوفها كدة"

(وده بيقولك إما إن نظام التعليم المتقدم في الدنمارك بردو ما بيجبش نتيجة مع كل الناس وإما إن الادعاء كوووول والصدق خنيق)

لأن الداعية من زملاء الانسانية إللي التاريخ بدأ عندهم السنة إللي فاتت ودنيتهم تنتهي آخر الشارع، أو في ميدان العتبة على أبعد تقدير، فهو لا يعرف ربما إن العالم تكاثر وبقى قبل اختراع "الزواج" بآلاف السنين - أي لما كانت كل الستات والرجالة عوانس. وهو لا يعرف أيضا لإن دنيته تنتهي آخر شارع شريف بالرغم من كونه في الدنمارك إن الناس - شوف إزاي - بتتكاثر في أنحاء كثيرة من العالم دون عقود زواج، ويتجاهل عمدا ربما إن العالم الذي شهد تراجع الزواج بعنف في القرن الحالي تضاعف سكانه مرتين في عين العدو ويهدد بالتضاعف مرة أخرى خلال القرن القادم بحيث إن حضرتك وحضرتي من كتر "البقاء" هنبقى واقفين بعون الله بالورب عشان نلاقي لنا مكان على الكوكب المزدحم.

مش عارفة لوحد قرر يسخف على روحه ويحلل نظرية معز بجدية - بفرض إن هذا ممكن أصلا - يبدأ من فين ولا من فين، من فوق ولا من تحت، من النشوء والارتقاء ولا من شارع شريف، من كتاب العلوم ولا كتاب المنطق، من داروين الملعون في كل كتاب ولا من الداعية الكوول إل مش خنيق، وفي الآخر مش طالبة خالص دلوقتي. يمكن في تدوينة تانية ماتكونش خنيقة.



29 comments:

مراقب مصري said...

ابدئي من كتاب حياتي يا عين


بس والنبي تلاقي النسخة "الكوووول" عشان تبدئي منها

Anonymous said...

ما حكيته عن حوار الرجل مع امرأة، ملحدة، و للصدفة، دنماركية، أعاد لي أفكارا عن كتابتنا للتاريخ، و التراث الديني، و الأدب، و طه حسين و الشعر الجاهلي.

من الممكن أن لا تكون هناك امرأة ملحدة دنماركية اقتنعت بأن التطور يتأثر سلبا. الغرض هو العظة.

محمد عبد الغفار said...

لم اره

ولكن اتوقع ما هو اكثر وياما لسه هيورد علينا طالما مفهوم ان الدين منحصر ما بين رحا الحلال والحرام هو السائد

ربيع said...

أهنيكي يا فندم ، انا شرقت من كتر الضحك

مرجانة said...

كثر الدعاة و تعددت اساليبهم و الدعوة واحدة و الله اعلم بمافي انفسهم وبما في جيوبهم وبما يملكون
ليس حقدا لا سمح الله
لكنني كنت اعتقد ان الدعوة الى الله ابتغاءا لمرضات الله ولوجهه الكريم فقط
ولكن يثبت لي زماني عكس ذلك
تحياتي لزبيدة

بنت القمر said...

لازم يساير الموضه وكذكر شرقي ومؤمن منتفخ لازم يبهر الانثي الغربيه الملحده
سيستم قديم
ضحكتيني
جدا

strategicalone said...

انا موش عارف اية الناس اللى بتتخنق لما تشوف القنوات المتخلفة دى نظامها اية . متهيالى ان القنوات دى اللى يدخلها يكون مستعد يسمع حاجات هبلة زى اللى بيقدمها وعلى خط واحد مع سياسة القناة يعنى اسمع ان ناس مبضونة من الجزيرة ويقولوا ان دى قناة ارهابية . طب واية يعنى ارهابية ولا بيطيخية وانت مالك ماتدخلشى عليها . بس انت يا زبيدة مفروض انك ما تنحدريس وتشوفى قنوات هلس زى كدة وتيجى تحكيلنا الهبل بتاعهم علشان احنا موش ناقصين .
واللى يلعب مع العيال يتعفص معرفش اية.
شكرا

karakib said...

الفكرة في انه لازم يروج لسلعته عن طريق الدين
الموضوع بيزنس بحت
مثلا في استراليا ... الصينيين في شوارع العرب كانوا ما بيحطوش كلمة حلال علي اللحوم المذبوحة .. و لما حطها واحد منهم .. بقي يبيع اكتر من اللي حواليه
فكلهم بقوا يحطوا كلمة حلال علي اللحوم
و امتد الامر الي الفواكة و الخضروات و الخبز و ... كل حاجه
نفس الكلام هما
الاغنيه الحلال ... الفيلم الحلال
نوع من الدعاية
و بيكسب
يا عزيزتي
العيب مش في العيش
العيب في اللي بياكلوه

DantY ElMasrY said...

كويسة
انتظرى قريبا الراقصة الإسلامية ......
وجيدة

^ H@fSS@^ said...

ضحكتيني يا زبيدة من نخاشيش قلبي
و كمان فكرة الراقصة الاسلامية دي تحفة
يا ترى حتبتدي تهز الوسط اليمين الاول و لا الشمال؟

Azza Moghazy said...

ولما تترفع مقاييس الجمال هتأثر على التطور لإن كل الستات هتعنس، وبالتالي ده هيأثر على البقاء. قالت لي: ياه، عندك حق، أنا أول مرة أشوفها كدة"

من الطريف والمفيد والعلمى ان نعرف ان النماركية بها مرادف لكلمة ياه
بل وعندك حق ايضا
ولكن كان سيكون من اللذيذ ان ارى كيف ادار معتز الدمرداش الذى هو ليس بكول على الاطلاق هذا الحوار
بالله عليكى ازاى قادرة تستحملى تتفرجى على القناة دى اصلا؟

آية said...

انا مش متفقة معاكي في الموضوع ده خالص بصراحة .. و أدهشني أكتر ان اللي معلقين على موضوعك موافقينك ..
انا حسيت ان هدفك الاساسي هو السخرية من الرجل ... مع ان الاكثر منطقية لحد يهتم بحرية الرأي و التعبير و العقيدة انك تحترمي منهجه و طريقته و الوبه و التي يقتنع بها الكثير و منقدرش نقول انهم غلط و لا يستلطفها الكثيرون ممن لا نستطيع ايضا ان نقول انهم غلط ... و لا ايه ؟؟

human said...

رغم كل الهبل دة ومع ذلك هتلاقيلة معجبين كتير
لاننا طبعا فى عصرالبدنجان
تحياتى الى ملوك ودعاة الصحوة

قضمات صغيره said...

هههه طريقتك في الكتابه مضحكه، in a good way akeed :D

متابع دائم لك .. استمري في نزع الاغلال عن المرأه .. فقد ظلمت لقرون ..

تحياتي

على باب الله said...

هههههههههههههههههه

كوول

bluestone said...

انا مش فاهمة احنا هنفضل نسفه من كل حاجة في حياتنا لحد امتى .. ؟ يعني هنوصل بالتفاهة لحد فين ؟؟؟؟
سفهنا الدين والدنيا والسياسة والحب والجواز والديموقراطية والحرية والاكل والشرب والفن .. حاجة زفت خالص

sa7ar said...

استغربت كتير من اجاباتكم وأنا مش معجبة ولا حاجة بس الظاهر انه ولا واحد فيكم شاف حتى حلقة واحدة من برامج معز وازاي اسلوبه جميل, وفي ناس كتير تركو الغلط لما سمعوه , أما عن شكله وملابسه فدي حاجة تخصه وحده,وكفاية انه يعترف ويتكلم عن حالته قبل ما ربنا يهديه
على الأقل فكر يعمل حاجة لدينه ووطنه
مش زي كتير مننا بس نتكلم
وسلام

ابراهيم said...

اعتقد انة لوكان ماركسيا او يتبع منهج فرويد اومومن بداروين
لبنيتي له قصرا واصبح رمزا للشباب يحتذي بة
احيك علي تقبلك للأخرين
وشكرا

soly88 said...

عزيزتى زبيده طخيه عيارين وريحينا انا قرفت من المناظر دى

Unknown said...

Very nice one ... can i use it in supporting my discussions? after ur permission.

"فهو لا يعرف ربما إن العالم تكاثر وبقى قبل اختراع "الزواج" بآلاف السنين"

even millions of years.

بحيث إن حضرتك وحضرتي من كتر "البقاء" هنبقى واقفين بعون الله بالورب عشان نلاقي لنا مكان على الكوكب المزدحم"

LoooooooooooL

i love cartoony examples :))

10 thumbs up

Unknown said...
This comment has been removed by the author.
عاشور الناجي said...

والله معز متعوس ده مع قناته الفضائية مع متتبعيها المنبهرين بيها مسخرة،


الحمد لإيل الذي سخرهم لنا لنضحك قليل

Fantasia said...

لأ وخدي بالك ان الملحدة لازم تكون دنماركية.. كدا هو ضرب عصفورين بحجر واحد. والمفروض بقى ان الملحدة دي بلهاء كمان, زي جمهور سي مسعود. يا لهوي ع السذاجة! وهو الحجاب المفروض بقى بيقلل مقاييس الجمال ولا بيمحيها خالص؟ عايزين نعرف برضه وجهة نظره الفذة في الموضوع ده. يا سلاااااااااام
ازاي احنا كنا عايشين من غير مسعووووود الكووووول ونظرياته الفاسدة.. قصدي الفذة؟

0987654321 said...

أهنيك على ها العمل الناجح
مزيداً من التألق
أخوانك في
http://araball.net
http://araball.net/vb/

African Doctor said...

Cool!
على رأي بارت سمبسون

كراكيب said...

اتعودت اني لما ادخل بلوج واقرا فيه حاجة ماتعجبنيش ما ادخلش وما اعلقش وكل واحد وتفكيره ووجهة نظره
بصي يا زبيدة....

الشباب نسيوا الدين وشايفين حلاله فعلا بيخنقهم وبيخنق تصرفاتهم ومش هيخليهم يتصرفوا بكامل حريتهم وحرامه بقى راضي لشهواتهم وحياتهم اللي عايزين يعيشوها بحرية وبدون ماحد يكتفهم
علشان كدة "معز" بيحاول يعمل من الحلال اللي خانقهم ده حاجة حلوة تشدهم وتبينلهم ان مش كل الحلال خنيق وان الحرام المبهر ممكن جدا نستغنى عنه لو دوقنا حلاوة الحلال

ادي فكرته وما اظنش ان فيها حاجة غلط خالص

ارجو انك تتقبلي كلامي ووجهة نظري بدون اي زعل

وانا مش هدخل باسم مش معروف
انا هدخل بالأكونت بتاعي عاااادي جدا

مرام

Anonymous said...

My words for you are not enough. A TRUE woman have I found amongst the false rubbish of today*s female. You brought me right home in one sentenace, as I live in scandinavia I could not beleive your words could take me right to Cairo, right to helio where I live, but you did it.

I have one question for you are you ready for a man like me, ? becuase I am certainly ready for a woman like you.
The Last Pharaoh

Marwa Rakha said...

hahahahahahaaaa

حبيبى و ابن حبيبى

http://www.elbadeel.net/index.php?option=com_content&task=view&id=19949&Itemid=96

واثق الخطوة said...

أهنيك على ها العمل الناجح
مزيداً من التأل
أخوانك في سماء روحي

سماء روحي
منتديات سماء روحي
منتديات
خواطر
البرامج