Tuesday, July 29, 2008

ما يحكمشي



يبدو وإن فهمي يزداد بطء مع السن، والسن له أحكام. وبالإضافة للبطء العام في الفهم يبطئ أيضا الفهم المعدل لمنطق الناس الذي تكون عبر السنين، فالفهم العادي غير الفهم المعدل، فهناك "بروجرام" مخصوص لمحاولة تفسير تصرفات الناس لا يصلح لتفسيرها البروجرام الأصلي المخصص لفهم الدنيا.

سن الواحدة كبر كمان على إنها تتعلم الشتيمة. بالرغم من إنني أستعيض بالسخرية عن السباب الذي لا معنى له، فقد استنفدت الكثير من طاقاتي وأصبحت أكثر ميلا للتعبير عن الغضب بطرق مريبة ... ليس من أغربها أن أنطلق في الغناء بصوت عال.

إيه إل فكرني بهذه الحكايات؟ السن والنسيان، آه... من كام أسبوع كدة اكتشفت إن فيه مجموعة من الشباب إل زي الورد من مجلة كلمتنا عاملين قال إيه يا أختي حملة عشان التحرش. ماشي. مش عيب. ربنا يكملهم بعقلهم. إنما إيه بقى يا إخوانا، شعار الحملة المُكن: لسة فيكي يا مصر رجالة و احترم نفسك.

باعتباري زي ما أسلفت فهمي بطيء أصلا، فأنا لم أفهم حتى الآن معنى شعار هذه الحملة الفتاكة: "لسة فيكي يا مصر رجالة"... بتتحرش بالستات؟ ولا "لسة فيكي يا مصر رجالة" فهنتحرش بالستات؟ ولا "لسة فيكي يا مصر رجالة" إذا فاكرين إننا هنبطل نتحرش بالستات؟ ولا "لسة فيكي يا مصر رجالة" فطبيعي نتحرش بالستات؟ بالإضافة إلى إن الشعار محير بدون تكملة لإنه لا يحمل جديدا. آه مصر لسة فيها رجالة، هو حد كان قال إنهم خلصوا؟ آه يا ابني آه، مصر لسة فيها رجالة وستات كمان، مش فاهمة إيه الهدف من إقرار حاجة عارفها أي عيل ماشي في الشارع. وبعدين واحدة من الأخوات الله يكرمها أوضحتلي ما استعصى علي فهمه، بسبب السن زي ما قلنا الذي له أحكام.

هي: "لأ يا أمي إنت مش فاهمة، "لسة فيكي يا مصر رجالة" هيحموا الستات من التحرش".

وبعد أن برقتلها نحوا من عشر دقائق قلتلها: "إنت متأكدة؟"

قالتلي :"آه والله زي ما بأقولك كدة".

المهم... بعد ما فسرتلي الزميلة سالفة الذكر وبرقتلها لم يبدو على دماغي أي فهم يزيد عما كان فيه قبل أن تفسر. فمعروف مثلا إن الرجالة هما إل بيتحرشوا بالستات ومعروف أيضا إن الرجالة في التلفزيون والراديو والجرنان والحمامات و غرف الدردشة وغرف النوم والحمام والصالون بيحملوا الستات مسئولية التحرش بيهم واللطيف كمان إنه على موقع الحملة نفسها الرجالة بيحملوا الستات مسئولية التحرش: طبيعي ما هو لما تحط شعار و"فكر" أهبل أن تتجتذب الهبل . ومعروف أيضا إن الراجل بيهتم بحماية "نسائه" من التحرش باعتبارهن ملكية خاصة وليس لأي اعتبارات تتعلق بانسانية الأخت المتحرش بها. ومعروف كمان، في التاريخ الشعبي: إن إل أقدر أفكه بإيديا، ما أستناش لما أحله بسناني.

وأثناء هذه الحيرة نشرت قصة في صحيفة البديل قبل أسبوعين لا أذكر تاريخها – وياريت ممن لديه التاريخ أن يذكره – عن بنت جميلة ظهرت حكايتها كلطمة على وجه هذه الحملة "العوق" وأصحابها "العوق" - لا مؤاخذه، قلة الأدب هتتبدي من أول هنا. أصل أنا فضلت صابرة وساكتة لحد ما ظهرت حكاية البنت دي، على أساس إن "مصر مافيهاش بنات يدافعوا عن نفسهم ويحطوا صوابعهم العشرة في عينين الرجالة ويقولولهم وقفوا عندكم" والأهم من كدة: "يجيبوهم من قفاهم". فهذه البنت الجميلة تعرضت للتحرش في وضح النهار في شارع من أكبر شوارع مصر الجديدة – الخليفة المأمون – الذي يعج بمواقع للجيش وحرس ومحلات – مليانة رجالة على فكرة – فما كان منها إلا أن أمسكت بالمتحرش ولما حاول الإفلات صعدت فوق كبوت عربيته النصف نقل وأمسكت وتمسكت بالرغم من محاولاته إسقاطها من فوق السيارة حتى أوفقته وخدته من قفاه على القسم الذي رفض "رجالته" الذين لسة في منهم في مصر أن يرسلوا معها عسكري ولا أمين شرطة ياخد بحسها لما أرسلت صديقتها للإبلاغ، فشدت هي الرجل بنفسها من قفاه بالرغم من محاولة الرجالة المحيطين – الذين لسة في منهم في مصر – نهيها ومنعها من شده من قفاه مشيرين إلى "إل هي لابساه هي وصاحبتها" وأخذت الرجل بنفسها للنيابة بعد أن رفض "رجالة القسم إل لسة في... إلخ" أن يقوموا بدورهم في ترحيله.

القصة دي أحلى ضربة على القفا لحملة "العوق" المذكورة. وأنا لو منهم أخجل من نفسي – إنما ده أنا. هم مستمرين في حملتهم الجامدة جدا ودهنوا الأرض في حفلة تامر حسني في مارينا. وقال إيه: "احترم نفسك". أياه: أكيد الرجالة إل بيمسكوا صدر الستات في الشارع اتخضوا قوي، وهيفكروا ألف مرة قبل ما يحطوا إيديهم في هدوم ست مرة تانية، بالرغم من إنهم عارفين إن مصر لسة فيها رجالة هيتعاونوا معاهم . عايزين يا ولاد نعمل حملة ضد جريمة إهدار المال العام نسميها: "احترم نفسك" وده أكيد هيقضي على ظاهرة إهدار المال العام. وبلاش رادار ولا ضباط مرور، نعمل حملة ضد السرعة نسميها: "احترم نفسك" وبالمرة لما حرامي يسرقك في الشارع ما تبلغش عنه البوليس: قول له يحترم نفسه.

خصيمكم النبي، ادخلوا على موقع الحملة وشوفوا نتيجة شعار ترللي وفكر تيكيلم تيكيلم زي "لسة فيكي رجالة يا مصر". نفس الدوائر المفرغة من النقاش حول ملابس الإناث من المتبولين لا إراديا، نفس الكلام عن إن عدم التحرش "منة" و"كرم" من الذكور، نفس التخلف، نفس الهبل، نفس القرف، نفس اليأس، نفس الغثيان وأمراض الذكورة.

ساعات بعد ما تبقى تبلدت من كتر "الهبل" إل بيترمى يمين وشمال تلاقي حاجة بسيطة تقولك "لسة في". لسة في بنات مش مستنية رجالة تحميها، لسة في بنات مش هتبص في الأرض لما الناس في الشارع يتهموها إنها السبب في التحرش، لسة في بنات مش هتحس بالعار وهي بتطالب بحقها من المجتمع والحكومة تالت ومتلت.

وعشان خاطر نهى الجميلة نعلن عن حملة "جيبيهم من قفاهم" في مواجهة حملة العوق بتاعة "لسة فيكي يا مصر رجالة" ودي التكملة المناسبة: "لسة فيكي يا مصر رجالة بتتحرش: جيبيهم من قفاهم". الحملة مش للبنات الهفأ إل باصة في الأرض ومستنية راجل يحميها. الحملة دي مدعوات لها الإناث فقط وتتلخص في أن المتحرش باللمس يتجاب من قفاه. ومن قفاه مش أي حتة تانية. ما تخافيش، إنت مش مضطرة تعملي ده مع كل متحرش كل يوم، إنما بعد ما كام ألف واحدة يجيبوا كام واحد من قفاهم هتغلى ضريبة التحرش، وممكن لو إنت في حفلة مارينا بتاعة تامر حسني وحد اتحرش بيكي تجيبيه من قفاه طبعا وتتفرجي على البنات الهبل بتوع الحملة العوق وهما عمالين يقولوا للمتحرش: "احترم نفسك" فيمسك صدرها، فتقوله: "بأقولك احترم نفسك، مصر لسة فيها رجالة" فيمسك بإيديه الاتنين، "الله؟ إنت مش عارف إن مصر لسة فيها رجالة ولا إيه؟" فيمسك بإيديه ورجليه فتقوله تاني: "احترم نفسك، مصر لسة فيها رجالة". فيرد عليها الرجل: "أيوة يا ستي فيها رجالة... تحبى أجيبهم ولا كفاية أنا؟!"

31 comments:

محمد عبد الغفار said...
This comment has been removed by the author.
محمد عبد الغفار said...

عزيزتى
احنا فى عصر الا منطق من زمان ، فأى هبل بيتمرر فضلاً عن وقوع الجميع فى فخ الأعتدال والوسطيه والشكل الراقى والدور الأيجابى وكل الحقوق بتضيع

Blank-Socrate said...

كله بياكل بعضه
الحكومه بتاكل الشعب
و الناس بتاكل لحم بعض
--------
و الجميع يرى انه مظلوم و ان ما يفعله بالاخريين مجرد حكمه او تصريف امور
--------
اما فى التحرش
لو فرضنا ان فتاة تسير عاريه تماما لن انظر لان لا اريد
------------
احييك على تدويناتك الواقعيه

بنت القمر said...

لو تقصدي المخرجه اغتقد الرابط ده ها
يفيدك

http://naelaltoukhy.blogspot.com/2008/07/blog-post_25.html

^ H@fSS@^ said...

طيب فكرة بجد يا زبيدة ممكن تسمحيلي افتح جروب على الفيس بوك بنفس الاسم اللي زكرتيه و حقول ان الاسم من عندك لو مافيش مانع
ممكن بجد؟؟
و لما افتحه حجيبلك اللينك بتاعه
بس مش حعمل اي حاجة من غير موافقتك الاول

تحياتي

سـردية said...

ههههههههههههههه
وما يحكمش ليه... ما هو حاكم من كام ألف سنة
طبعاً فيه رجاله في مصر ... اكيد حتلاقي هنا ولا هنا... القليل منهم مش من مخصي الأدمغة ... بس بخصوص التحرش في العام كنا في فرقة مسرح الشارع بنعمل بروفاتنا على سطح حزب التجمع إللي في وسط البلد وجت رحمة إللي بتعلمنا فن التمثيل بتعيط وكان زوجها عبد العزيز مخيون معانا وقالت ان فيه شباب في الشارع كانوا بيعاكسوا البنات ولما مرت من ادامهم قال واحد منهم: مش حنعكسك علشان انت مش حلوة.... طبعا حاول مخيون اقناعها ان ما قالوه في حد ذاته معاكسه برضه.... وانا من عشاق الجمال .. أقول للحلو أنت حلو في عينه... لكن بدأت اخاف...عايز اعرف ينوبك ثواب بدل ما اتبهدل أين الخط الفاصل بين المعاكسة لو شفت أنثى جميله وبين التحرش... هل يعتبر تعبير - مثلاً - " أكيد ماما بقرة علشان تجيب القشطة دي كلها " هل يعتبر تحرشاً
أم ان التحرش مرتبط باللمسات والتحسيس والفعص الطبي
أم سيظل تعريف التحرش مبهم زي مصطلح الأرهاب
تحياتي

أحمد said...

اه والنبى لحسن انا بضانى انتفخت من حملات التحرش دى
لا وكله كوم
والحملة الابضن بتاعت
انا مش مزة

أشرف حمدي said...

يا نهار ابيض
انا مش حقول إنه مقال رائع وجميل ومبدع الخ الخ الخ
انا حقول غني بقيت من دراويش الست صاحبة المدونة
مش مبالغة بجد

مش عارف أرد على ايه ولا ايه
بس اللي أقدر أقوله إني متفق تماما مع كل حرف اتكتب

وياريت لو تسمحيلي بنشر المقال على جروب احترم نفسك نفسه
عارف انه حيتمسع بعد لحظات بس انا حعرف انشره ازاي
مع التنويه لصاحبة المقال وعنونا المدونة طبعا
تحياتي

معتز said...

ليه انا مش شايف كده
ليه انا شايف تعصب

بيتهيقلي بدون خلاف معاكي ان الشعار رومانسي اوي

بس ايه المطلوب من الشعار انا (برغم اني مش مشارك في الحمله واقعيا) بس علي الاقل حسيت بالامل ان لسه فيه ناس بتفكر بتحاول تلم نفسها يمكن ساعتها يبقوا قوه فكريه ما يقدروا يقترحوا فكره تغير الكون

صحيح ان كلامك جديد عليا من ناحيه انهم بيحملوا البنات مسؤليه البلا بلا بلا

بس علي الاقل دي مش مشكله الشعار دي مشكله التفكير بتاع الناس

أغرب حاجه في التدوينه دي انها ولأول مر حسستني أنك بتجادلي مش بتناقشي

خالص أحترامي

معتز

Azza Moghazy said...

صباح الفل
دى مجلة كلمتنا
كلمتناااااااا

دول زى الست بتاعة صبايا بتاعة المحور اللى مضايقاكى دى مرفوع عنهم القلم
هم والمعاقين ذهنيا اللى بيقروا المجلة الشبابية تحن
تحن تحن
طبيعى المستويات الفكرية دى متفهمش غير ان حماية الحريم واجب الرجالة لان الحريم برضه حريم " من الحرمانية يعنى "كما قيل ذات مرة فى مترو الانفاق
ومن الطبيعى ان الحريم بما انهن " قوارير" مش بس كدة دول خلقن من ضلع اعوج
فهم مكسورين وفى قول اخر منكسرين بالفطرة
ومستنيين الرجالة اللى فمصر يدافعوا عنهم
بقوللك ايه متتعبيش نفسك والله
بلا حرقة دم سيبيها تولع طالما انتى بخير
دى مصر يا زبيدة

اه وابقى شوفى تدوينة نائل اللى بنت القمر جابتها كمان ستسعدين كثيرا والنبى

human said...

واللة يستحقوا جايزة انهم اكتشفوا الاكتشاف الكبير دة
اخيرا اتاكدنا ان لسة فى رجالة فى مصر
الحمد لللللللة

karakib said...

انا اكتشفت جروب افضل من كده
بيدعو لمنع الاختلاط في الجامعات
و الشواطيء
في دلوقتي شاطيء شرعي في مارينا اسمه لا فام
http://www.masrawy.com/News/Various/AFP/2008/August/8/554190.aspx
صباح الفل
طبعا مصر فيها رجالة

Empress appy said...

هههههههههههههه والله ناس هايله هايله طيب انا كتبت على المعاكسه فى بوست عندي اسمه مين بيعاكس مين وبرضه هاجموا البنت يالا دنيا

Azza Moghazy said...

النهاردة الفرافير كانوا عندى الفرفور الاكبر مهتز الدمرداش عالمحور
واذ بى اعرف ان الاخوة المشاركين فى الحملة هم نفسهم اصحاب حملة " النفيس يستحق ان يحترم " بتاعة البوستر اياه اللى فيه تلت ذكور على ركبهم بيشكلوا بايديهم حلقة بتحمى بنت محجبة
شفت الحلاوة
عثل عثل عثل يعنى

الصورة اهى بتاعة الحملة
http://www.facebook.com/photo.php?pid=97963&op=1&o=all&view=all&subj=19495430115&aid=-1&oid=19495430115&id=1078998684

????? said...

مع احترامى لكلامك على اساس انه رأيك وانتى حره فيه بس انا مش مقتنع بمعظم الكلام بصى انا مش متدين بس انتى شيلتى كلام ربنا خالص من المعادله ربنا بيقولك البسى لبس محترم عشان تمنعى عن نفسك المعاكسات والتحرش اظن ده كلام ربنا مش كلامى ثانيا الشباب عندنا فى مصر عندهم حرمان وكبت جنسى فمش معقول ان انتى تبقى ماشيه عريانه فى الشارع انا مش هتأثر مثلا بصى دى مدونه انا كتبها يا ريت تقريها واشوف رأيك فى الكلام اللى انا كتبه http://moodieg.blogspot.com/

Anonymous said...

thx 3ll post

good post

Unknown said...

الشعار ده دليل على ان مشكلة التحرش الي بتخلي من المستحيل على الواحدة تمشي في الشارع الا لو لافة نفسها في الهدوم زي الكفن وبرده مش حاتسلم ، هي مش مشكلة منفصلة حتتحل لوحدها لان ببساطة المجتمع محتاج يتفور كله على بعضه كده وده شئ عادي جدا في اي مجتمع مغلق ومتجه اكثر للانغلاق ومجتمع ذكوري شايف ان الانسان في الاصل راجل وبعدين طلعت له زائدة دودية اسمها الست ...

ana ga3an said...

الفراغ يعمل اكتر من كدة
ويخلق جروبات اعبط من كدة
والحل موجود للقضاء علي المتحرشين
اللباس الالكتروني
اللباس السوبر نوفا او اللباس الالكتروني و دة بيلبسو كل من اتهم في قضية تحرش
يعني و كل واحد و مدة عقوبتة يعني ممكن واحد ياخد سنتين مع اللباس
او 5 سنين مع اللباس
وظيفتة اول ما الشخص تظهر علية بوادر تحرش يروح اللباس مديلة شحنة صاعقة 20 فولت لو ما اتردعش يزيد ل 80 ثم 250 ثم 1000 الي ان يصاب بعجز و في الحالة دي ممكن الست والدتة تستخدم اللباس في تحمير البطاطس و ان اهيب بالحكومة انها تعمم الاختراعات دي و عمل لجان تفتيش في اماكن التجمعات و الاتوبيسات يعني كل اتوبيس يركب فية مفتش للبسة معاة لبيسة زي بتاعة الجزم و يالا يا حضرات كل واحد ينزل البنلطون في تفتيش
ممكن واحد فلحوس يقولي طيب فلنفترض المتحرش المنفذ للعقوبة حب يقضي حاجتة يعني
طبعا احنا منسيناش الحكاية دي بيكون في فتحة مخصصة للامر دة
ولازم يقدم طلب قبليها بيوم و تحضر لجنة معها مفتاح اللباس الالكتروني
ويتم الفتح في حضور 3 ممثلين من اللجنة
مرفق مع الفكرة طلب مقدم للسيد احمد عز بتاع الحزب الوطني و حديد عز
توفير كميات حديد مسلح تكفي للمحكوم عليهم
مع الوعد بوضع ختم جودة عز الدخيلة علي كل قطعة مباعة
هذا وبالله التوفيق

admelmasry said...

بوست يستاهل عشرة علي عشرة .. موافق معاكي قلبا وقالبا
.
.
خصوصا بالنسبة للمرضي النفسيين اللي شايفين ان البنت هي السبب والقرف دا
.
.
ع الفيس بوك فيه جروب اسمه
.
.
الرد علي حملة لسه فيكي يا مصر رجالة
.
.
النقاش هناك يصبب الفقع
للمراة ولاشياء اخري
.
.
واعتقد ان لن يجدي الكلام في امور يسيطر الغالبية الجاهلة علي مجرايتها
.
فلا هم يقتنعوا ولا هم يستطيعوا اجراء مناقشة تتسم بالحيادية او الموضوعية
.
.
احدهم يقول في موضوع له علي الجروب
انه سيقف رقيب علي حرية الاخر
لان حرية الاخر هذه حدودها .. الا تؤذيه
.
وهو من حقة ان يمشي في الشارع والا تقع عيناه علي ما يكدر صفو ليلته
.
فعندما تمشي بنت او امرة في الشارع بما لا يعجب قرارة نفسه فهي ليست حرة بالطبع لانها تقع في مدي رؤيته البصرية .. وتكدر الحالة المزاجية له
.
فبذلك تعدت هي علي حريته
.
.
كل هذه المرض والذي يصيبني احيانا بانتفاخ اخرجة رائحة كريهه في وجه هؤلاء .. يجعلني اقول
.
.
لسه بدري
.
.
تحياتي والسلام

> said...
This comment has been removed by the author.
> said...

لأ تصدقي معاكي حق !
انا لقيتهم فعلا بيقولو الكلام العبيط ده !
بس في صورة لذيذه اوي ومعبره خصوصا لو لاحظنا احد الشباب السيس إللي قاعدين إللي لابس اخضر علي اليمين في الأول نشوفه عنيه فين بالظبط
نياهاهاعع
http://www.facebook.com/photo.php?pid=3891929&op=3&o=all&view=all&subj=20112551897&aid=-1&oid=20112551897&id=618010064#pid=3891700&id=618010064

مرجانة said...

ازيك يا زبيدة
انا شايفة ان مجتمع ذكوري زي بتاعنا
الستات فيه قلائل الحيلة
و يقهرها الرجل بمعدل -نقول كل يومان- وطبعا قصدي معنويا وحتى النساء برده بيقهروها يوميا
-طبيعي ان تكون المبادرة من الرجال و تكون الحماية تاتي من الرجال
في عصر الردة الذي نعيشه الان طبيعي ان يكون الذكر هو الذي يقود حملة مثل تلك وليس موضوع الحملة بالهدف الفاشل
وعلى فكرة لو كانت اصلا النساء هن البادئات بتلك الحملة لضحك الذكور كما لم يضحكوا من قبل
كما ان المتحرش ذاهب عقله لانه مكبوت جنسيا فى مجتمع على اعتاب ثورة جنسية وحائر بين اصولية تهب عليه و مثيرات فضائية و محجبات مثيرات ايضا
فصار كل ما يسير على الارض يثيره حتى الهرة
تحياتي

ionised said...

في إعتقادي المشكلة الحقيقية إن مفيش جواز وللأسف تيجي تفتح الدش تلاقي كل الشيوخ بتهاجم الجواز العرفي مع إن بعضهم متجوز اكتر من واحدة.ده غير الستات اللي بتطلع تحذر و تهول وممكن تولول على اللي هتتجوز عرفي ,ونسيوا الجنس اللي كان السبب في انهم يجوا الدنيا من أساسوا

زفت said...

زبيدة

انت روعة

بس

Purple Rose of Cairo said...

مصر مافيهاش و لا رجالة و لا ستات ... فيها شعب مقهور و حقوقه منتهكة من سلطة يمينية عسكرية و معارضة يمينية دينية ... شعب فقد اشياء كثيييير اهمها القدرة على النقد و التحليل و بالتالى اى فكرة هبلة "بتاكل" مع الناس و اى دعوة بتلاقى الاف يطبللها
احنا بقينا "اوطى من الموس على الأرض" و لسة بنقع
شكرا يا زبيدة

Fantasia said...

يسلم فمك والله.. هو دا الكلام.. قال لسة فيكي يا مصر رجالة قال؟ ما احنا عارفين ياخويا منك له.. هو حد جابك ورا غير الرجالة اللي فيكي يا مصر؟

لسة فيكي يا مصر بنات مجدع.. وبنات تعرف تدافع عن نفسها وتاخد حقها من بق السبع وتدب صوابعها في عينيه كمان

هذه الحملة هي اعادة لانتاج نفس الثقافة الذكورية العفنة ولكن في ثوب جديد.. ثوب راعي الغنم (ما هو الغرب عنده راعي بقر واحنا عندنا راعي غنم) اللي عشان يثبت إنه راجل لازم يحافظ على غنمه
لازم الراجل يكون هو محور كل شيء واسمه يكون في أي حاجة.. حتى لو حملة معنية بالمرأة والدفاع عنها ضد التحرش الجنسي اللي بيقوم بيه الراجل.. ما ينفعش هي اللي تخلي اللي قدامها يحترم نفسه ورجله فوق رقبته.. لأ.. لازم الباشا الراجل يستغل مأساتها كمان ويتاجر بيها لاثبات رجولته وانه دكر ويعرف يحافظ على حريمه

حملة تقرف.. تكرس نفس منهج التفكير اللي تسبب في هذه المأساة من أساسها! يا فرحتي.. معدش فيكي يا مصر أخلاق.. معدش فيكي يا مصر ضمير.. معدش فيكي يا مصر قانون.. معدش فيكي يا مصر حقوق انسان.. كل اللي نابك شوية رجالة عايزين ينفشوا ريشهم.. اشربي يا مصر

Romantic said...

بصي أنا بكره البنت اللي تقول قليلة الحيلة
والقهر
والرجالة
والخرا
لازم البنت تعرف تحمي نفسها
وازاي تتكلم
ومع مين تتكلم
وازاي تجبر اللي قدامها انه يعاملها كانسان
مش فريسة
تحياتي

bluestone said...

ياست الستات
الحملات دي اصلها من باب ما احنا حلوين اهه ومحترمين

سيبك منهم

انا اللي شاغلني فعلا .. وبعدين؟؟
يعني المجلس الموقر بيناقش مشروع قانون لمكافحة التحرش .. بس حلني
وبرضه سن القانون هيعمل ايه
ما بلدنا مليانة قوانين على كل لون يا تشريع

بس الحل ايه؟
يعني لازم يبقى فيه حل من الاناث نفسهم
يعني مثلا
الواحدة لازم تتصرف
مش ممكن واحد يتحرش بيها في الشارع
وكل اللي تقدر عليه انها تقوله اختشي عيب
ولا تشتمه

خصوصا ان الحيوانا مش هتفرق معاها اي شتيمة ممكن تتقالها
خصوصا والشتيمة مش بتلزق يعني

بس لازم يكون فيه حاجة بتضايق الراجل المتحرش وتحرق دمه
لازم والله يا حرملك يكون فيه حل
عشان الواحد قرف بجد

انا كنت بفكر من مدة اشتري مسدس لعبة من بتاع العيال واملاه حبر
او سائل ريحته وحشة
واللي يقل ادبه في الشارع ارشه عليه عشان بس احرق دمه ابوظ يومه زي ما بوظ يومه

عماد said...

و أيضا الإعلان دا كمان معلش

هل تعرف إنه يمكنك ان تحتفظ بديانتك و أن تكون يونتاريان فى نفس الوقت ؟

هل تعرف إنه من الممكن أن تكون مسلم و يونتاريان فى نفس الوقت ؟

ثلاثه من رؤساء امريكا و ثلاثه من الأباء المؤسسين للولايات المتحده الامريكيه و نيوتن و داروين و جراهام بل و مكتشف مذنب هالى و لينوس بولج الحائز على جائزة نوبل مرتين و صاحب الكرسى الى جلس عليه احمد زويل
كل هؤلاء كانوا يونتاريان

http://somethingforthesoul.blogspot.com/2008/10/blog-post.html

هل تريد أن تصبح مثلهم على عقيدة العلماء و القاده الذين خدموا البشريه

mardlyta said...

اهم حاجه ان انت دمك خفيف قوى والاحلى من كده ان بالك طويل على حكايات عوق زى كده هحكيلك حكايا لذيذه خالص هتخليكى تدورى على باسبورك وتمشى
انا يا ستى محجبه بالغصب بالتبعيه بالاقناع اهو متنيله وخلاص ردا على التعليق بتاع البنت لازم تراعى الشاب المصرى المحروم الجعان الحيوان المقزز اللى الكلب اشرف وانضف منه عشان مش لاقى ياكل ينهش فى لحم الناس سلملى على الجاهليه وسلملى برده على المتأسلمين واياكوا اشوف كلب منك يا مصر المتحرشه بيتكلم عن الاسلام
معلش انفعلت لكن اكمل الحكايه لما اكون لابسه عبايه سووووووووووووووودا وعاليها طرحه طويله سودا وماشيه راحه الزفت السوق والدنيا مش زحمه ولا حاجه وواحد يتحرش بيا ولما اضربه بكل اللى فى ايدى يضربنى ويتلموا عليا رجاله مصر يشلوا ويهزئونى حيث انى مش محترمه ازاى انزل اجيب اطفح
ما علينا لسه بنتكلم على الحقيره اللى اسمها مصر والاحقر منها رجالتها ان كانوا رجالاه اصلا لو تدورى عليه تلاقيه ما عندوش انتصاب اصلا
ههههههههههه
ما علينا يا ست زبيده ما يحكمش انك عايزه بنت تدافع عن نفسها وسط رجاله وستات ممكن يضربوها بالجزمه عشان لابسه جينز ومممكن يقولولها كام ايه فى القران لزوم الحجاب او يقولولى زى ما قالى الاخوانجى وقرن فى بيوتكن
اسلام ابوكوا هوه ياكلاب عشان تقولوا اللى انتوا عيزينه وتعمله اللى انت عيزينه

Unknown said...


دمك خفيف وبتخلي شر البيلية يُضحك

أولا: هي السنة معاكي كام؟
2016
صحيح
إرجعي 10 أو 20 أو خمسين أو 100 سنة الى الوراء
كم حالة تحرش كانت تسجل في مصر سنوياً
لماذا

...
هل تكفي ثلاث نقاط كإجابة
والرجاء من الشعوب العربية إعادة ضبط سنواتها
بدل 2016
الى أي سنة تتناسب مع السلف الصالح

قال لينين (عليه السلام) الدين أفيون الشعوب
فسبوه


الدين الذي بدأ بكلمة إقرأ 3 مرات
الدين الذي أعطى الذاهب الى المدرسة 60 حسنة عل كل خطوة، وأعطى الذاهب الى الصلاة حسنة واحدة
الدين الذي قال إطلبو العلم ولو في الصين . على أساس انها آخر الدنيا
صار نيراً (لا أقصد منيراً ولكن النير الذي يوضع حول عنق الثور عند الحراثة) هو وسيلة لنوع جديد من السلطة
التحكم
التسلط
الإستعباد
الإستغباء
لست متديناً والحمد لله (إذا وُجِد) لذا لست أدافع عن الدين بتعصب بل اتحدث بمنطقهم
لماذا يصوم المسلمون في رمضان؟
لماذا لهم حسنات بالمقابل
ليروضوا انفسهم هكذا يجيبون
أوليس الأحرى بهم ترويض غرائزهم

يـــــــا قـــــــــــــوم
يـــــــا أيــــهـــــــا المسلمـــــــــون
يــــــــــــــا من يسمعــــــــون
يــــــــا مــــــن يقـــــــــرأون
يـــــــا أيهـــــــــا الســــــــاجدون
على علبة التروس في السيارة الحرف
R
يعني رجوع .... مش ركض كما يظن البعض

إعذروني على الصرف والنحو وأخطائي بهما إن وردت